1.വാട്ട്സ് ആപ്പ് ഗ്രൂപ്പിലെ ചര്‍ച്ചാക്ലാസ്സുകള്‍
ഓണ്‍ലൈന്‍ ക്ലാസ് കഴിഞ്ഞാലുടനെ ക്ലാസ്സ് ഗ്രൂപ്പുകളില്‍ കുട്ടികളുടെ സന്ദേശം വരും.
'മാഷേ,എത്രമണിക്കാണ് ചര്‍ച്ചാക്ലാസ്സ്?'
വാട്ട്സ് ആപ്പ് ഗ്രൂപ്പിലെ തുടര്‍ചര്‍ച്ചാക്ലസ്സിനെക്കുറിച്ചാണ് കുട്ടികള്‍ക്ക് അറിയേണ്ടത്.അവര്‍ക്ക് ഏറെ ഇഷ്ടമാണത്.ഗ്രൂപ്പില്‍ ടീച്ചറോട് സംസാരിക്കാം.സംശയങ്ങള്‍ ചോദിക്കാം.ടീച്ചറുടെ ചോദ്യങ്ങള്‍ക്ക് മത്സരിച്ച് ഉത്തരം പറയാം.പാഠഭാഗങ്ങള്‍ വായിച്ചു കേള്‍പ്പിക്കാം.കവിത ഈണത്തില്‍ ചൊല്ലികേള്‍പ്പിക്കാം.എന്തൊക്കെ പ്രവര്‍ത്തനങ്ങളാണ് ചെയ്യേണ്ടത് എന്നതിനെക്കുറിച്ച് ടീച്ചര്‍ വ്യക്തത നല്‍കും.
വൈകുന്നേരം രക്ഷിതാക്കള്‍ ജോലികഴി‍ഞ്ഞ് എത്തിയാല്‍ മാത്രമേ ചില കുട്ടികള്‍ക്ക് ഫോണ്‍ കിട്ടുകയുള്ളു.അവരെക്കൂടി പരിഗണിച്ചാണ് അങ്ങനെയൊരു സമയം സിശ്ചയിച്ചത്.
ചര്‍ച്ച തുടങ്ങുന്നതിന്നു മുമ്പായി അതാതു ക്ലാസ്സുകളിലെ ഗ്രൂപ്പില്‍ വന്ന് എല്ലാവരും ഹാജര്‍ രേഖപ്പെടുത്തും. ക്ലാസ്സ് കാണുമ്പോഴും ഹാജര്‍ രേഖപ്പെടുത്തണം. അന്നത്തെ ക്ലാസിലെ വിഷയം പഠിപ്പിക്കുന്ന അധ്യാപകരായിരിക്കും ചര്‍ച്ച നയിക്കുക.
മിക്കവാറും എല്ലാകുട്ടികളും പ്രവര്‍ത്തനങ്ങള്‍ സമയത്തുതന്നെ പൂര്‍ത്തിയാക്കി ഗ്രൂപ്പില്‍ ഇടും. അങ്ങനെ ചെയ്യാനാണ് അവര്‍ക്കിഷ്ട്ം.കുട്ടികള്‍ക്ക് പരസ്പരം വിലയിരുത്താനുളള വലിയ സാധ്യതയാണ് ഇതു തുറന്നിടുന്നത്.സ്വന്തം സൃഷ്ടി മറ്റുള്ളവരുടേതുമായി തട്ടിച്ചുനോക്കാം..ടീച്ചര്‍ ഓരോ കുട്ടിയുടേയും പ്രവര്‍ത്തിനുനേരെ ഫീഡ്ബാക്കുകളും നല്‍കും.അത് ഗുണാത്മകമാകാന്‍ പ്രത്യേകം ശ്രദ്ധിക്കും.ഗ്രൂപ്പിലായതുകൊണ്ട് ഓരോ കുട്ടിക്കും നല്‍കിയ ഫീഡ്ബാക്കുകള്‍ എല്ലാവര്‍ക്കും വായിച്ചുനോക്കാം.ഫീഡ്ബാക്കുകളുടെ അടിസ്ഥാനത്തില്‍ മെച്ചപ്പെടുത്തേണ്ടതുണ്ടെന്നു തോന്നുന്നവര്‍ അങ്ങനെചെയ്ത് അയക്കും.പരസ്പര വിലയിരുത്തലും ഫീഡ്ബാക്കു നല്കലുമൊക്കെ സമയപരിമിതിമൂലം ഒരു സാധാരണ ക്ലാസുമുറിക്കകത്ത് നടപ്പാക്കാന്‍ ഞങ്ങള്‍ ഏറെ പ്രയാസപ്പെടാറുണ്ട്.
തുടര്‍ചര്‍ച്ചാ ക്ലാസ്സുകള്‍ ഏറെ ഗുണകരമാകുന്നുണ്ട്.കുട്ടികള്‍ യഥാര്‍ത്ഥ ക്ലാസിലാണിരിക്കുന്നതെന്ന തോന്നലുണ്ടാക്കാന്‍ ഇതിലൂടെ കഴിയുന്നു.നല്‍കുന്ന പ്രവര്‍ത്തനങ്ങള്‍ കുട്ടികള്‍ താതപര്യത്തോടെ ഏറ്റെടുത്ത് ചെയ്യുന്നുണ്ട്.അവര്‍ക്ക് ചോദ്യങ്ങള്‍ ചോദിക്കാനും സംശയങ്ങള്‍ ദൂരികരിക്കാനും കഴിയുന്നു. പ്രവര്‍ത്തനങ്ങള്‍ കൂടിപ്പോകുന്നതായി തോന്നുന്നില്ല.ഓരോ ക്ലാസിനുശേഷം തുടര്‍ന്നും അവരുടെ ടീച്ചര്‍മാര്‍ നയിക്കുന്ന ചര്‍ച്ചാ ക്ലാസ്സുകള്‍ വേണം.
എം.എം.സുരേന്ദ്രന്‍,
ഗവ.യു.പി.സ്ക്കൂള്‍,പുറച്ചേരി,
മാടായി.കണ്ണൂര്‍
